పారిస్ 2024 ఒలింపిక్స్లో 100 గ్రాముల అదనపు బరువు కారణంగా ఫైనల్ బౌట్కు ముందు అనర్హత వేటుకు గురైన భారత రెజ్లర్ వినేష్ ఫొగాట్కు నిరాశే ఎదురైంది. అంతర్జాతీయ ఒలింపిక్ కమిటీ తీసుకున్న నిర్ణయాన్ని సవాల్ చేస్తూ వినేష్ ఫొగాట్ చేసిన అప్పీల్ను కోర్ట్ ఆఫ్ ఆర్బిట్రేషన్ ఫర్ స్పోర్ట్స్ (CAS) తిరస్కరించింది. దీంతో తాను పాల్గొన్న మూడో ఒలింపిక్స్లోనూ వినేష్ ఫొగాట్ పతకం లేకుండానే వెనుదిరిగినట్లయింది. దీంతో భారత్ ఏడో పతకం సాధిస్తుందని ఉన్న ఆశలు ఆడియాశలయ్యాయి. ఆరు పతకాలతోనే భారత్ పారిస్ ఒలింపిక్స్ నుంచి అధికారికంగా వెనుదిరిగింది.
పారిస్ 2024 ఒలింపిక్స్లో వినేష్ ఫొగాట్ మెరుగైన ప్రదర్శన చేసింది. రౌండ్-16లో డిఫెండింగ్ ఛాంపియన్ జపాన్కు చెందిన యుయిని 3-2ను చిత్తు చేసి షాక్ ఇచ్చింది. ఆ తర్వాత క్వార్టర్స్, సెమీఫైనల్లోనూ అదే జోరు కొనసాగించి ఫైనల్కు చేరింది. ఈ ఈవెంట్లో ఫైనల్ చేరిన తొలి మహిళా రెజ్లర్గా నిలిచింది. వినేష్ ఇదే జోష్లో స్వర్ణం సాధిస్తుందని అంతా భావించారు. ఫైనల్ కోసం సమస్త భారతావని ఉత్కంఠగా ఎదురుచూసింది. కానీ ఫైనల్కు కొన్ని గంటల ముందు భారత్కు ఊహించని ఎదురుదెబ్బ తగిలింది.
వంద గ్రాములు అదనంగా బరువు ఉందనే కారణంతో వినేశ్ ఫొగాట్పై ఒలింపిక్ కమిటీ, రెజ్లింగ్ కమిటీ అనర్హత వేటు వేసింది. ఈ నిర్ణయాన్ని వినేష్ పొగాట్ కోర్ట్ ఆఫ్ ఆర్బిట్రేషన్ ఫర్ స్పోర్ట్స్ (CAS)లో సవాల్ చేసింది. తాను పల్గొన్న 50 కిలోల ఫైనల్లో ఓడిన లోపెజ్ (క్యూబా)తో కలిసి తనకు రజత పతకం ఇవ్వాలని అభ్యర్థించింది. దీనిపై తీర్పును పలుమార్లు వాయిదా వేస్తూ వచ్చిన కోర్ట్ ఆఫ్ ఆర్బిట్రేషన్ ఫర్ స్పోర్ట్స్ (CAS) చివరకు వినేష్ ఫొగాట్కు వ్యతిరేకంగా తీర్పునిచ్చింది..!
అయితే.. వినేష్ ఫొగాట్కు ఎరుదైన ఈ గడ్డు సమయంలో సమస్త భారతదేశం అండగా నిలబడింది. ఆమె మద్దతుగా నెట్టింట పోస్టులు పెడుతూ.. ధైర్యం చెప్పింది. పీఎం నరేంద్ర మోదీ సైతం.. వినేష్ ఫొగాట్కు మద్దతుగా ట్వీట్ చేశారు. తాను ఛాంపియన్లకే ఛాంపియన్ అంటూ కొనియాడారు. కాగా.. ఈ తీర్పు కంటే ముందే.. వినేష్ తన రెజ్లింగ్ కెరీర్కు రిటైర్మెంట్ ప్రకటిస్తూ.. మరో సంచలన నిర్ణయం కూడా తీసుకున్న విషయం కూడా తెలిసిందే.
