NCLAT: 2 రోజుల్లో 35 శాతం కుప్పకూలిన స్టాక్.. ఒక్కసారిగా అప్పర్ సర్క్యూట్.. దివాలాపై వెనక్కి..!
Coffee Day Shares: కాఫీ డే ఎంటర్ప్రైజెస్కు భారీ ఊరట లభించింది. కంపెనీ దివాలా ప్రాసెస్ ప్రారంభించాలని NCLT ఇచ్చిన తీర్పుపై అప్పీలేట్ ట్రైబ్యునల్ స్టే విధించడంతో ఊపిరి పీల్చుకుంది. కేఫ్ కాఫీ డే పేరిట కాఫీ డే ఎంటర్ప్రైజెస్ రిటైల్ చెయిన్ నిర్వహిస్తున్న సంగతి తెలిసిందే. ఒక కేసుకు సంబంధించి.. దివాలా ప్రక్రియ ప్రారంభించేందుకు నేషనల్ కంపనీ లా ట్రైబ్యునల్ ఆదేశాలు ఇవ్వగా.. తాజాగా దీనిపై అప్పీలేట్ ట్రైబ్యునల్ (NCLAT) బుధవారం రోజు స్టే విధించింది. కాఫీ డే ఎంటర్ప్రైజెస్ ఎగ్జిక్యూటివ్ డైరెక్టర్, సీఈఓ అయిన మాళవిక హెగ్డే పిటిషన్ దాఖలు చేయగా.. దీనిపై చెన్నై ధర్మాసనం ఈ మేరకు మధ్యంతర ఉత్తర్వులు జారీ చేసింది. తదుపరి విచారణ జరిగే వరకు ఈ స్టే అమల్లో ఉంటుందని వెల్లడించింది.
>> రూ. 228.45 కోట్ల ఎగవేత నేపథ్యంలో దివాలా ప్రక్రియ చేపట్టాలని ఐడీబీఐ ట్రస్టీ షిప్ సర్వీసెస్ దాఖలు చేసిన విజ్ఞప్తిని NCLT బెంగళూరు బెంచ్ ఆగస్ట్ 8న ఆమోదించింది. ఒక తాత్కాలిక పరిష్కార నిపుణుడిని కూడా నియమించింది. ఈ ఒక్క కారణంతో కాఫీ డే షేరు కుప్పకూలిపోయింది. ఆరోజు ఇంట్రాడేలో 20 శాతం వరకు పతనమైంది. చివరకు 15 శాతం నష్టంతో సెషన్ ముగించింది. మరుసటి రోజు కూడా 15 శాతం వరకు పడిపోయింది. దీంతో 2 రోజుల్లోనే 35 శాతం వరకు స్టాక్ పడిపోవడం గమనార్హం.
ఇప్పుడు ఎన్సీఎల్ఏటీ నుంచి స్టే లభించడం కాఫీ డే కంపెనీకి ఊరట కలిగించే అంశం. 3 వారాల్లో అఫిడవిట్ దాఖలు చేయాలని ఐడీబీఐ టీఎస్ఎల్ ను ఆదేశించింది కూడా. ఈ క్రమంలో బుధవారం సెషన్లో స్టాక్ పుంజుకుంది. 5 శాతం అప్పర్ సర్క్యూట్ కొట్టి.. రూ. 36.75 వద్ద స్థిరపడింది. మార్కెట్ విలువ రూ. 772.19 కోట్లకు చేరుకుంది.
2019లో కాఫీ డే జారీ చేసిన డిబెంచర్లకు సంబంధించి.. ఐడీబీఐ దరఖాస్తు చేసుకొని రూ. 100 కోట్లు చెల్లించింది. వీటిని తిరిగి చెల్లించడంలో కాఫీ డే విఫలమైంది. దీంతో ఎగవేత నోటీసులు అందించింది. తర్వాత NCLT దివాలా ప్రక్రియ ప్రారంభించమని ఆదేశించింది. 2019లో కంపెనీ ఫౌండర్ వీజీ సిద్ధార్థ మృతి అనంతరం.. కాఫీ డే కష్టాల్లో చిక్కుకుంది.
