సుప్రీంకోర్టు ఆదేశం.. సెంటర్ల వారిగా నీట్ ఫలితాలు ప్రకటించిన ఎన్టీఏ

సుప్రీంకోర్టు ఆదేశాలతో నీట్ యూజీ పరీక్ష ఫలితాలను సెంటర్ల వారీగా నేషనల్ టెస్టింగ్ ఏజెన్సీ (ఎన్టీయే) శనివారం ఉదయం వెలువరించింది. వైద్య విద్యలో ప్రవేశాల కోసం నిర్వహించిన నీట్ యూజీ పరీక్షపై దేశవ్యాప్తంగా తీవ్ర దుమారం రేగుతున్న విషయం తెలిసిందే. ఈ అంశంపై సర్వోన్నత న్యాయస్థానంలో పలు పిటిషన్ల దాఖలు కాగా.. వాటిపై ప్రధాన న్యాయమూర్తి జస్టిస్ డీవై చంద్రచూడ్, జస్టిస్ జేబీ పార్ధీవాలా, జస్టిస్ మనోజ్ మిశ్రాలతో కూడిన త్రిసభ్య ధర్మాసనం విచారణ కొనసాగిస్తోంది. గురువారం నాటి విచారణలో కేంద్రాల వారీగా పరీక్ష ఫలితాలను జులై 20 మధ్యాహ్నం 12 గంటల్లోగా వెలువరించాలని ఎన్టీఏను ధర్మాసనం ఆదేశించింది. ఈ నేపథ్యంలో సెంటర్ల వారీగా ఫలితాలను వెబ్‌సైట్‌లో ఎన్టీఏ పొందుపరిచింది. ఫలితాలను Exams.nta.ac.in/NEET/, neet.ntaonline.inలో చూసుకోవచ్చిన పేర్కొంది.

కాగా, నీట్‌ అంశంపై సోమవారం మరోసారి సుప్రీంకోర్టులో విచారణ జరగనుంది. మే 5 దేశవ్యాప్తంగా 4,750కిపైగా కేంద్రాల్లో నీట్-యూజీ పరీక్షను నిర్వహించగా.. దాదాపు 24 లక్షల మంది విద్యార్థులు హాజరయ్యారు. అయితే, 67 మంది మొదటి ర్యాంకు రావడంతో పాటు 1,5663 మంది గ్రేస్ మార్కులు ఇవ్వడం, కొన్ని కేంద్రాల్లో పరీక్షకు హాజరైనవారు పెద్ద సంఖ్యలో అర్హత సాధించడంతో అక్రమాలు జరిగినట్టు అనుమానాలు వ్యక్తమయ్యాయి.

నీట్ పేపర్ లీక్ ఆరోపణలపై సీబీఐ దర్యాప్తునకు కేంద్రం ఆదేశించింది. గురువారం నాటి విచారణ సందర్భంగా దర్యాప్తు నివేదికను ధర్మాసనానికి సొలిసిటర్ జనరల్ తుషార్ మెహతా సమర్పించారు. ఝార్ఖండ్‌ రాష్ట్రం హజరీబాగ్‌లోని ఓ పరీక్షా కేంద్రంలో నీట్ జరిగిన రోజున ఉదయం 8 గంటల నుంచి 9.20 మధ్య పేపర్ లీక్ అయ్యిందని ఆయన వివరించారు. దీనిపై ధర్మాసనం తీవ్రంగా స్పందించింది.. పరీక్ష ఉదయం 10.15 గంటలకు ప్రారంభమేతే, కేవలం 45 నిమిషాల్లోనే 180 ప్రశ్నలను పూర్తిచేయడం సాధ్యమవుతుందా? అని ప్రశ్నించింది.

ముఠాలోని ఏడుగురు వ్యక్తులు విభజించుకుని ఒక్కో సెక్షన్ పూర్తిచేశారని తుషార్ మెహతా దీనికి బదులిచ్చారు. పిటిషనర్ల తరఫు సీనియర్ న్యాయవాది నరేందర్ హుడా వాదనలు వినిపిస్తూ…. నీట్-యూజీ 2024ను నిర్వహించడంలో ఎన్టీఏ పూర్తిగా విఫలమైందని, పరీక్షను రద్దు చేయాలని కోరారు. ప్రశ్నపత్రాల రవాణాలో అలసత్వం వహించారని ఆరోపించారు. హజారీబాగ్‌లో ఆరు రోజులు ఓ ప్రైవేట్ కొరియర్ కంపెనీ వద్దే ఉన్నాయని ఆయన పేర్కొన్నారు. ఎంతో భద్రత మధ్య వాహనాల్లో తరలించాల్సిన వాటిని.. వాటిని పరీక్షా కేంద్రానికి ఇ-రిక్షాలో తరలించారని, ఈ ఆరోపణలపై ప్రిన్సిపాల్‌ను అరెస్టు చేశారని ఆయన అన్నారు.

అయితే, పరీక్షను రద్దుచేసి రీటెస్ట్ నిర్వహించే విషయంలో సుప్రీంకోర్టు ముందు నుంచి ఒకటే అభిప్రాయం వ్యక్తం చేస్తోంది. లీక్ వల్ల పరీక్ష పెద్ద మొత్తంలో ప్రభావితం అయితేనే రీ-టెస్ట్‌కు ఆదేశిస్తామని ఉద్ఘాటించింది. హజరీబాగ్‌‌లో ఓ కేంద్రానికి ఇది పరిమితమైనట్టు భావిస్తున్నామని జులై 19 నాటి విచారణ సందర్భంగా అభిప్రాయపడింది.