ఏపీలో డ్వాక్రా మహిళలు, విద్యార్థులకు బంపరాఫర్..

ఆంధ్రప్రదేశ్‌లో డ్వాక్రా మహిళలు, విద్యార్థులకు ప్రభుత్వం శుభవార్త చెప్పింది. రాష్ట్రవ్యాప్తంగా డ్వాక్రా మహిళలు, విద్యార్థులకు రాయితీపై విద్యుత్‌ సైకిళ్లను అందించే ప్రతిపాదనను తీసుకొచ్చింది. ఈ మేరకు ముఖ్యమంత్రి నారా చంద్రబాబు నాయుడు కీలక వ్యాఖ్యలు చేశారు. అమరావతి సచివాలయంలో ఈఈఎస్ఎల్(ఎనర్జీ ఎఫిషియన్సీ సర్వీసెస్ లిమిటెడ్) సీఈఓ విశాల్ కపూర్, ఆ సంస్థ ప్రతినిధులతో సీఎం చంద్రబాబు సమావేశమై రాష్ట్రంలో ఎనర్జీ ఎఫిషియన్సీ పెంచడానికి చేపట్టే కార్యక్రమాలపై చర్చించారు. రాష్ట్రంలో ఇంధన సామర్థ్య కార్యక్రమాలకు ప్రాధాన్యత కల్పిస్తామని.. పీఎంఏవై (ప్రధాన మంత్రి ఆవాస్‌ యోజన)లో భాగంగా నిర్మించిన ఇళ్లలో ఇంధన సామర్థ్య విద్యుత్‌ ఉపకరణాలను రాయితీపై అందిస్తామన్నారు. ప్రభుత్వ ఉద్యోగులకూ విద్యుత్‌ పరికరాలు సబ్సిడీపై అందిస్తామని చెప్పారు.

ఆంధ్రప్రదేశ్‌ను బెస్ట్ ఎనర్జీ ఎఫిషియంట్ (ఉత్తమ ఇంధన సామర్థ్యం) రాష్ట్రంగా మారుస్తామన్నారు చంద్రబాబు. రాష్ట్రంలో ఎలక్ట్రానిక్ రంగంలో మార్పులకు శ్రీకారం చుట్టామన్నారు. ఈ మేరకు సబ్సీడీలో ఈ-సైకిల్, ప్రభుత్వ ఉద్యోగులకు విద్యుత్ పరికరాలు సబ్సీడీలో అందజేస్తామన్నారు. అలాగే పలు అంశాలపై ఈఈఎస్ఎల్ సంస్థ ప్రతినిధులు ముఖ్యమంత్రి చర్చించారు. ఎలక్ట్రిక్ సైకిళ్లను సబ్సీడీలో డ్వాక్రా మహిళలకు, విద్యార్థులకు అందిస్తామని ఈఈఎస్ఎల్ సంస్థ కూడా తెలిపింది. ఈ మేరకు ఎలక్ట్రికల్ సైకిల్ మోడల్స్‌ను ముఖ్యమంత్రి చంద్రబాబుకు చూపించారు.

ఈఈఎస్ఎల్ తో గృహ నిర్మాణ, ఇంధన, పంచాయతీ రాజ్, గ్రామీణాభివృద్ధి, మున్సిపల్ సహా పలు కీలక విభాగాలు కలిసి పనిచేస్తాయన్నారు చంద్రబాబు. ఇంధన సామర్థ్యంలో రాష్ట్రానికి మళ్లీ పూర్వ వైభవాన్ని తీసుకొచ్చేందుకు ప్రభుత్వం సిద్ధంగా ఉందన్నారు. ప్రజలకు, ప్రభుత్వానికి ఆర్థికంగా, పర్యావరణ పరంగా లబ్ధి చేకూరేలా విధానాలు ఉండాలని, ఆ మేరకు ప్రతిపాదనలు సిద్ధం చేయాలని ఈఈఎస్ఎల్ ప్రతినిధులకు సూచించారన్నారు. ఆర్టీసీలో కూడా పెద్ద ఎత్తున విద్యుత్ వాహనాలను ప్రమోట్ చేస్తున్నామని, ప్రభుత్వ భవనాల్లో కూడా సోలార్ వినియోగం పెంచబోతున్నట్లు తెలిపారు.

ఎనర్జీ జనరేషన్‌తో పాటు సేవింగ్ కూడా ముఖ్యమన్నారు చంద్రబాబు. స్వల్పకాలి ప్రయోజనాలతో పాటు దీర్ఘకాలిక ప్రయోజనాలను కూడా దృష్టిలో పెట్టుకుని నిర్ణయాలు తీసుకుంటున్నామన్నారు. గతంలో రాష్ట్రంలో 25 లక్షల ఎల్ఈడీ వీధి దీపాలు ఏర్పాటు చేశామని, కానీ తర్వాత వచ్చిన ప్రభుత్వం వాటి నిర్వహణను గాలికొదిలేసిందని అన్నారు. దీని వల్ల 60 శాతం వీధి దీపాలు మాత్రమే వెలుగుతున్నాయని అన్నారు. త్వరలో మళ్లీ ఎల్ఈడీ దీపాల వెలుగులు తెచ్చేందుకు చర్యలు తీసుకుంటున్నట్లు ముఖ్యమంత్రి వివరించారు. మరోవైపు దీపం పథకం కింద ప్రభుత్వం అందించే లబ్ధి గురించి కూడా ప్రస్తవానకు వచ్చింది. ప్రభుత్వం అందించే మూడు గ్యాస్‌ సిలిండర్లకు బదులు.. ఒక ఇండక్షన్‌ స్టౌ, రెండు సిలిండర్లు అందిస్తే ప్రయోజనాలు ఉంటాయంటున్నారు. దీని వల్ల గ్యాస్‌ వినియోగం తగ్గి, లబ్ధిదారులకు ఏటా రూ కోట్లలో ఆదా అవుతుందని.. పథకం అమలుకు ప్రభుత్వం చేసే ఖర్చులో కోట్ల రూపాయలు మిగులుతాయని ఈఈఎస్‌ఎల్‌ సీఈఓ విశాల్‌కపూర్ ప్రస్తావించారు.