ఏపీలో వారందరికి 50 ఏళ్లు దాటితే పింఛన్.. కొత్తగా దరఖాస్తులు, ప్రభుత్వం కీలక నిర్ణయం

ఆంధ్రప్రదేశ్ ప్రభుత్వం కీలక నిర్ణయం తీసుకుంది. రాష్ట్రంలో కొత్త పింఛన్ల మంజూరుకు గ్రీన్ సిగ్నల్ ఇచ్చింది.. ఐదుగురు మంత్రులతో కూడిన సబ్‌ కమిటీ ఏర్పాటు చేయాలని.. మార్గదర్శకాల రూపొందించాలని అధికారులను ముఖ్యమంత్రి చంద్రబాబు ఆదేశించారు. అంతేకాదు రాష్ట్రవ్యాప్తంగా పాత పింఛన్లను కూడా ఇదే కమిటీ సమీక్షించనుంది. వైఎస్సార్‌సీపీ ప్రభుత్వ హయాంలో రాష్ట్రవ్యాప్తంగా.. భారీగా అనర్హులకు పింఛన్లు మంజూరు చేశారనే ఫిర్యాదులున్నాయన్నారు చంద్రబాబు.. వారి అర్హత పరిశీలనకు కూడా విధి విధానాలు రూపొందించాలని ఆదేశించారు.

పింఛన్ల విషయంలో ఈ రెండు అంశాలపై నెలలోపు సమగ్ర నివేదికను అందించాలని అధికారులను ముఖ్యమంత్రి చంద్రబాబు ఆదేశించారు. గత ప్రభుత్వ హయాంలో అర్హత ఉన్నా చాలా మందికి పింఛన్లు అందలేదని.. అర్హత ఉన్న ఏ ఒక్కరూ పింఛన్‌కు దూరం కాకుండా పక్కగా మార్గదర్శకాలు రూపొందించాలి అన్నారు. ఎన్నికల సమయలో 50 ఏళ్లు దాటిన ఎస్సీ, ఎస్టీ, బీసీ, మైనారిటీలకు పింఛను అందిస్తామనే హామీ అమలుకుగాను ఇప్పటికే సర్వే పూర్తి చేశారు. రాష్ట్రవ్యాప్తంగా 50-60 ఏళ్ల మధ్య వీరు 15 లక్షల మంది ఉన్నట్లు గుర్తించగా.. వీరికి పింఛను అందించేందుకు కార్యాచరణ రూపొందించాలి అన్నారు. ఈ మేరకు తదుపరి సమావేశంలో అమలుకు దిశానిర్దేశం చేయనున్నట్లు తెలిపారు.

రాష్ట్రంలో సామాజిక ఫింఛన్‌దారుల అర్హతను నిర్ధారించే అంశంపై త్వరలోనే మంత్రివర్గ ఉపసంఘాన్ని ఏర్పాటు చేయనున్నట్లు మంత్రి కొండపల్లి శ్రీనివాస్‌ తెలిపారు. రాష్ట్రంలో కొందరు అనర్హులు సామాజిక పెన్షన్లు తీసుకుంటున్నారని.. బైక్‌లు ద్విచక్ర నడుపుతున్న వ్యక్తులు సైతం రూ.15వేలు వికలాంగ పింఛను తీసుకుంటున్నారని తెలిపారు. అంతేకాదు రాష్ట్రంలో డ్వాక్రా సంఘాలను మైక్రో పారిశ్రామిక వేత్తలుగా మార్చాలన్నది కూటమి ప్రభుత్వ నిర్ణయం తీసుకుందని.. 10 జిల్లాల్లో ఎస్పీవీలను ఏర్పాటు చేసి, మహిళా పారిశ్రామికవేత్తల్ని ప్రోత్సహిస్తాము అన్నారు.

మరోవైపు రాష్ట్రవ్యాప్తంగా 1000కిపైగా ఉత్పత్తులను డ్వాక్రా మహిళలు తయారు చేస్తున్నారు.. వాటిని మార్కెటింగ్‌ సౌకర్యం కల్పిస్తామన్నారు. అమరావతిలో డ్వాక్రా ఉత్పత్తుల ఎగ్జిబిషన్ కోసం 10 ఎకరాల భూమి ఇచ్చేందుకు ముఖ్యమంత్రి అంగీకరించినట్లు మంత్రి శ్రీనివాస్‌ తెలిపారు. గత ప్రభుత్వ హయాంలో డ్వాక్రా సంఘాలకు చెందిన స్త్రీనిధి బ్యాంకు నుంచి రూ.950 కోట్లు పీడీ ఖాతాలకు మళ్లించింది అన్నారు. ఎన్నికలకు నెల రోజుల ముందు రూ.500 కోట్లు పీడీ ఖాతాలకు మార్చేసి స్త్రీనిధి బ్యాంకును అప్పుల్లో ముంచారని.. ఈ వ్యవహారాలపై విచారణ చేయించాలని నిర్ణయించామన్నారు మంత్రి శ్రీనివాస్. మొత్తం మీద ఏపీలో కొత్త పింఛన్లకు దరఖాస్తులతో పాటుగా, అనర్హుల పింఛన్లను తొలగించాలని ప్రభుత్వం నిర్ణయం తీసుకుంది. అలాగే ప్రభుత్వం త్వరలోనే మార్గదర్శకాలు రూపొందించి విధివిధాానాలను విడుదల చేయనున్నారు.