విజయవాడలో ఎన్నాళ్లకెన్నాళ్లకు.. ఐదేళ్ల తర్వాత మళ్లీ కృష్ణమ్మకు హారతి కార్యక్రమం

ఆంధ్రప్రదేశ్‌లో కూటమి ప్రభుత్వం అధికారంలోకి వచ్చిన తర్వాత పలు కీలక నిర్ణయాలు తీసుకుంది. 2014 నుంచి 2019 మధ్య అధికారంలో ఉన్న సమయంలోని కార్యక్రమాలు గత ప్రభుత్వ హయాంలో ఆగిపోయాయి.. అయితే వాటిని తిరిగి ప్రారంభిస్తోంది. తాజాగా ఏపీ ప్రభుత్వం మరో కీలక నిర్ణయం తీసుకుంది. విజయవాడ సమీపంలో ఇబ్రహీంపట్నం దగ్గర ఉన్న గోదావరి-కృష్ణా సంగమ ప్రాంతమైన పవిత్ర సంగమం ఫెర్రీ దగ్గర మళ్లీ కృష్ణమ్మ హారతి కార్యక్రమాన్ని ప్రారంభించనున్నారు.

కృష్ణమ్మ హారతి కార్యక్రమాన్ని నెల రోజుల్లోగా తిరిగి ప్రారంభించేందుకు అవసరమైన చర్యలు తీసుకుంటున్నట్లు దేవాదాయశాఖమంత్రి ఆనం రామనారాయణరెడ్డి తెలిపారు. కృష్ణమ్మ హారతి తిరిగి ప్రారంభానికి సంబంధించి ఏర్పాటైన మంత్రుల బృందం సమావేశం కూడా నిర్వహించింది. గతంలో ముఖ్యమంత్రి చంద్రబాబు ఆధ్వర్యంలో పవిత్ర సంగమం వద్ద కృష్ణమ్మ హారతిని ఒక పవిత్ర ఆధ్యాత్మిక కార్యక్రమంగా ప్రతి రోజూ నిర్వహించారని గుర్తు చేశారు మంత్రి ఆనం రామనారాయణరెడ్డి. గత ఐదేళ్ల వైఎస్సార్‌సీపీ పాలనలో ఈ కార్యక్రమాన్ని నిర్వహించకుండా నిర్లక్ష్యం చేశారన్నారు.

కూటమి ప్రభుత్వం అధికారంలోకి వచ్చిన తర్వాత.. ఇప్పుడు నెల రోజుల్లో హారతి కార్యక్రమాన్ని పున:ప్రారంభించాలని ముఖ్యమంత్రి చంద్రబాబు నిర్ణయించినట్లు మంత్రి తెలిపారు. ఈ హారతి కార్యక్రమానికి సంబంధించి.. పవిత్ర సంగమం దగ్గర రోడ్లు, విద్యుత్తు బస్సు సౌకర్యం, ఇతర సదుపాయాలు పూర్తిస్థాయిలో పునరుద్ధరించేందుకు ఆయా శాఖల అధికారులు వేగంగా చర్యలు తీసుకోవాలన్నారు. రాబోయే రోజుల్లో ఈ ప్రాంతాన్ని ఒక పవిత్ర ఆధ్యాత్మిక, పర్యాటక ప్రాంతంగా తీర్చిదిద్దేందుకు అన్ని చర్యలూ తీసుకోవాలని ప్రభుత్వం నిర్ణయించిందని.. పవిత్ర సంగమం దగ్గర టీటీడీ, దేవాదాయశాఖ ఆధ్వర్యంలో దేవాలయాన్ని ఏర్పాటు చేయాలని కూడా భావిస్తున్నారట.

విజయవాడ సమీపంలోని ఇబ్రహీంపట్నం ఫెర్రి దగ్గర గోదావరి-కృష్ణా పవిత్ర సంగమం ఉంది. 2014 – 2019 మధ్య టీడీపీ ప్రభుత్వ హయాంలో.. 2016 అక్టోబరులో కృష్ణా పుష్కరాల సందర్భంగా పవిత్ర సంగమం దగ్గర కృష్ణా నిత్య హారతుల కార్యక్రమాన్ని అప్పటి ముఖ్యమంత్రి చంద్రబాబు ప్రారంభించారు. రాజమహేంద్రవరం దగ్గర గోదావరి హారతిని స్ఫూర్తితో కృష్ణా హారతి కార్యక్రమాన్ని ప్రారంభించారు. ఈ పవిత్ర సంగమం దగ్గర పర్యాటకంగా.. ఇంద్రకీలాద్రిపై ఉన్న దుర్గామల్లేశ్వరస్వామి దేవస్థానం ఆధ్వర్యంలో నిత్యం నవ హారతులు ఇచ్చేవారు. నంది, నాగ, కుంభ, సింహా, సూర్య, చంద్ర, ఓంకార, పంచ, నక్షత్ర హారతులు ఇచ్చేవారు. ఈ హారతి కార్యక్రమం 2019 వరకు కొనసాగగా.. ప్రతి రోజూ వేలాది మంది భక్తులు ఇక్కడికి వచ్చి కృష్ణా హారతిని వీక్షించేవారు. గత ప్రభుత్వం అధికారంలోకి వచ్చాక ఈ కార్యక్రమం ఆగిపోయింది. మళ్లీ కూటమి ప్రభుత్వం అధికారంలోకి రావడంతో హారతి కార్యక్రమాన్ని తిరిగి ప్రారంభించనున్నారు.