బాధితురాలిని హత్యాచారం చేసిన చోటును ఫోటోలతో సహా చూపించండి.. హైకోర్టు ఆదేశాలు

దేశవ్యాప్తంగా తీవ్ర దుమారం రేపిన పశ్చిమ బెంగాల్‌లోని ఆర్‌జీ కర్ ఆస్పత్రిలో ట్రైనీ డాక్టర్‌పై ఈ నెల 8 వ తేదీన జరిగిన రేప్, మర్డర్‌ ఘటనపై ఆ రాష్ట్ర హైకోర్టు తీవ్రంగా సీరియస్ అయింది. ఇక ఈ హత్యాచార ఘటనపై ఆ రాష్ట్రంలో మొదలైన ఆందోళనలు, నిరసనలు తీవ్ర హింసాత్మకంగా మారుతున్నాయి. ఈ క్రమంలోనే తాజాగా బుధవారం అర్ధరాత్రి ఆర్‌జీ కర్ ఆస్పత్రిలోకి చొరబడిన గుర్తు తెలియని వ్యక్తులు.. ఆస్పత్రిలో వీరంగం సృష్టించారు. ఈ ఘటనపై కలకత్తా హైకోర్టు తీవ్రంగా మండిపడింది. ఈ ఘటనపై బెంగాల్ సర్కార్‌దే బాధ్యత అని ఆగ్రహం వ్యక్తం చేస్తోంది. ఈ క్రమంలోనే పశ్చిమ బెంగాల్ పోలీసులకు కీలక ఆదేశాలు జారీ చేసింది.

ఇక దుండగులు ఆస్పత్రిలోకి చొరబడి.. హత్యాచారం జరిగిన ప్రాంతంలో ఆనవాళ్లు లేకుండా చేసేందుకు ప్రయత్నించారని ఆరోపణలు వెల్లువెత్తాయి. ఈ నేపథ్యంలోనే బెంగాల్ పోలీసులకు తాజాగా కలకత్తా హైకోర్టు ఆదేశాలు ఇచ్చింది. ఆర్‌జీ కర్ ఆస్పత్రిలో హత్యాచారం జరిగిన ఘటనకు సంబంధించి.. క్రైమ్‌సీన్ చెక్కుచెదరకుండా ఉందని నిరూపించే ఫొటోలను చూపించాలని పోలీసులను ఆదేశించింది. ఆస్పత్రిపై దుండగుల దుశ్చర్య ఘటనపై కూడా సీబీఐ దర్యాప్తునకు ఆదేశించిన విషయం తెలిసిందే.

ఈ సందర్భంగా బెంగాల్ సర్కార్‌పైనా కలకత్తా హైకోర్టు తీవ్ర ఆగ్రహం వ్యక్తం చేసింది. ఇక ఇలాంటి సున్నితమైన అంశంపై ప్రజా నిరసనలకు అనుమతి ఎలా ఇచ్చారో తెలుసుకోవాలనుకుంటున్నామని ప్రభుత్వాన్ని ప్రశ్నించింది. అదే సమయంలో పోలీసులకు నిఘా విభాగం ఉంటుందని.. గతంలోనూ ఇలాంటి ఘటనలు జరిగినట్లు పేర్కొంది. 7 వేల మంది ఒక్క దగ్గరికి చేరితే.. ఆ విషయం పోలీసులకు ముందుగానే తెలియదు అనడం నమ్మశక్యంగా లేదని తీవ్ర అసంతృప్తి వ్యక్తం చేసింది.

ఇది పూర్తిగా రాష్ట్ర యంత్రాంగం వైఫల్యమని.. ప్రభుత్వం సొంత మనుషులనే కాపాడుకోలేకపోయిందని.. ఇలాంటి పరిస్థితుల్లో డాక్టర్లు ధైర్యంగా ఎలా సేవలు అందిస్తారని ప్రశ్నించింది. ఇలాంటి సంఘటనలు మళ్లీ జరగకుండా చర్యలు తీసుకోవాలని రాష్ట్ర ప్రభుత్వానికి సూచించింది. ఈ క్రమంలోనే తాము ఆ ఆర్‌జీ కర్ ఆస్పత్రిని మూసివేస్తామని.. అక్కడ చికిత్స పొందుతున్న వారిని వేరే ఆస్పత్రికి తరలిస్తామని తెలిపింది. ప్రస్తుతం ఆర్‌జీ కర్ ఆస్పత్రిలో ఎంతమంది చికిత్స పొందుతున్నారని కలకత్తా హైకోర్టు ప్రశ్నించింది.

అయితే ట్రైనీ డాక్టర్‌పై అత్యాచారం, హత్య జరిగిన ప్రాంతం కోసం దుండగులు వెతికారని.. అయితే అది వారికి దొరకలేదని బాధితురాలి తరఫు లాయర్ పేర్కొన్నారు. అయితే వారు పొరపాటున వేరే గదులను ధ్వంసం చేశారని.. అయితే ఇందులో పోలీసులు కాపాడింది ఏమీ లేదని వాదించారు. వారు పొరపాటు పడటం వల్లే క్రైమ్ సీన్‌ ధ్వంసం కాలేదని వెల్లడించారు. ట్రైనీ డాక్టర్‌పై జరిగిన హత్యాచారానికి వ్యతిరేకంగా ఒకవైపు రాష్ట్ర వ్యాప్తంగా నిరసనలు వెల్లువెత్తుతుంటే ముసుగులు ధరించిన కొందరు దుండగులు కర్రలు, ఇటుకలు, రాడ్లతో ఆర్‌జీ కర్ ఆస్పత్రిలోకి చొరబడి దాడులు చేశారు. ఎమర్జెన్సీ వార్డ్, నర్సింగ్‌ స్టేషన్, ఫార్మసీ, ఔట్‌ పేషంట్‌ విభాగాలతోపాటు సీసీటీవీలను ధ్వంసం చేశారు.

బుధవారం అర్ధరాత్రి సుమారు 40 మంది దుండగులు ఆస్పత్రిలో విధ్వంసం సృష్టించారు. వారిని చెదరగొట్టడానికి పోలీసులు బాష్పవాయు గోళాలు ప్రయోగించారు. ఈ ఘటనలో కొందరు పోలీసులకు గాయాలయ్యాయి. దీంతో బెంగాల్‌లో మరోసారి ఆందోళనలు వెల్లువెత్తాయి. మరోవైపు.. ట్రైనీ డాక్టర్‌పై హత్యాచారం చేసిన నిందితులకు మరణశిక్ష విధించాలని ఇప్పటికే బెంగాల్ ముఖ్యమంత్రి మమతా బెనర్జీ డిమాండ్ చేశారు. ఆదివారంలోగా సీబీఐ దర్యాప్తు పూర్తి చేయాలని ఆమె అల్టిమేటం ఇచ్చారు. కోల్‌కతా పోలీసులు 90 శాతం దర్యాప్తును పూర్తి చేశారని దీదీ తెలిపారు. నిందితులకు ఉరి శిక్ష విధించాలని డిమాండ్ చేస్తూ శుక్రవారం సాయంత్రం ర్యాలీ చేయనున్నట్లు బెంగాల్ సీఎం ప్రకటించారు.