Red News Navyandhra First Digital News Portal
CM Nara chandrababu naidu Review on Health Department: అధికారంలోకి వచ్చిన తర్వాత పాలనలో తన మార్కు చూపిస్తున్న ఏపీ సీఎం చంద్రబాబు నాయుడు పలు కీలక నిర్ణయాలు తీసుకుంటున్నారు. అలాగే 2014 ప్రభుత్వ హయాంలో తీసుకువచ్చిన అనేక కార్యక్రమాలను తిరిగి ప్రారంభిస్తున్నారు. ఈ క్రమంలోనే సీఎం చంద్రబాబు నాయుడు మరో పథకాన్ని తిరిగి ప్రవేశపెట్టాలని నిర్ణయం తీసుకున్నారు. సోమవారం ఆరోగ్యశాఖ మీద సీఎం సమీక్ష నిర్వహించారు. సచివాలయంలో నిర్వహించిన సమీక్షలో మంత్రి సత్యకుమార్ యాదవ్, వైద్యారోగ్యశాఖ అధికారులు పాల్గొన్నారు. ఈ సందర్భంగా వైద్యారోగ్యశాఖలో 2014-19 మధ్య అమలు చేసిన ఉత్తమ విధానాలను మళ్లీ ప్రవేశపెట్టాలని చంద్రబాబు అధికారులను ఆదేశించారు. వైసీపీ విధానాలతో ప్రభుత్వాసుపత్రులంటే ప్రజల్లో నమ్మకం పోయిందన్న చంద్రబాబు.. ప్రజల్లో తిరిగి నమ్మకాన్ని తీసుకురావాల్సిన బాధ్యత ప్రభుత్వంపై ఉందని అన్నారు.
మరోవైపు ఎన్టీఆర్ బేబీ కిట్లను తల్లులకు అందించాలని చంద్రబాబు అధికారులను ఆదేశించారు. శిశువులకు అవసరమైన సామాగ్రిని కిట్స్ ద్వారా పంపిణీ చేయాలన్నారు.గతంలో 2016లో టీడీపీ ప్రభుత్వం ఎన్టీఆర్ బేబీ కిట్ల పంపిణీని ప్రారంభించింది. ప్రసవం తర్వాత శిశువులకు ఇన్‌ఫెక్షన్ సోకకుండా ఉండేందుకు గానూ ఎన్టీఆర్ బేబీ కిట్ల పంపిణీ పథకాన్ని తీసుకువచ్చింది. ఈ కిట్‌లో నవజాతి శిశువులకు అవసరమైన వస్తువులను అందుబాటులో ఉంచారు. చిన్న పరుపు, చేతులు శుభ్రం చేసుకునే లిక్విడ్, బేబీ సబ్బు, పౌడర్‌, దోమతెర గొడుగు, న్యాప్‌కిన్లను కిట్ల రూపంలో బాలింతలు అందజేసేవారు. అయితే వైసీపీ ప్రభుత్వం కొన్నాళ్లపాటు ఈ పథకాన్ని అమలు చేసింది. ఆ తర్వాత సరిగ్గా అమలు కాలేదనే ఆరోపణలు ఉన్నాయి.
ఈ నేపథ్యంలో ఎన్టీఆర్ బేబీ కిట్లను తిరిగి పంపిణీ చేయాలని చంద్రబాబు అధికారులను ఆదేశించారు. అలాగే ప్రభుత్వం తరపున యాప్ రూపొందించి హెల్త్ కార్డు ద్వారా ప్రైవేట్ ఆసుపత్రిలో చేరిన వ్యక్తికి సంబంధించిన వివరాలు పొందుపరచాలని చంద్రబాబు సూచించారు. ఆస్పత్రిలో రోగికి అందించే వైద్య సేవలు, పరికరాలు, ఇచ్చే మందుల వివరాలను కూడా యాప్‌లో నమోదు చేయాలని అన్నారు. ఇక రాష్ట్రంలో కిడ్నీ బాధితులు ఎంతమంది ఉన్నారనే దానిపై మండలాల వారీగా వివరాలు సేకరించాలని అధికారులను చంద్రబాబు ఆదేశించారు. సీటీ స్కాన్ సర్వీసెస్‌ను అన్ని జిల్లా ఆస్పత్రులలో ఏర్పాటు చేయాలని.. రాష్ట్రంలో టీబీ రోగులు ఎంతమంది ఉన్నారనే దానిపై అధ్యయనం చేసి వారికి మందులు అందించాలని ఆదేశించారు.
ఫీడర్ అంబులెన్సుకు సాధారణ అంబులెన్సుకు మధ్య అనుసంధానం పెంచాలన్న చంద్రబాబు.. డోలీ మోతలు ఇంకా కనబడుతున్నాయన్నారు. డోలీ మోతలు మళ్లీ రిపీట్ అయితే సంబంధిత అధికారులపై చర్యలు తీసుకుంటామని హెచ్చరించారు. ఫీడర్ అంబులెన్స్‌లు వెళ్లగలిగినప్పటికీ సాధ్యం కాదని నిర్లక్ష్యం వహిస్తే… నేరుగా తానే ప్రాంతాన్ని సందర్శిస్తానని చంద్రబాబు చెప్పారు. ఆసుపత్రుల్లో రోగులకు నాణ్యమైన బెడ్ షీట్లు అందించాలని స్పష్టం చేశారు. అలాగే నియోజకవర్గం స్థాయిలో పీపీపీ విధానంలో ఆసుపత్రి ఏర్పాటు చేస్తామని సీఎం.. ప్రభుత్వమే స్థలం అందిస్తుందని చెప్పారు. ప్రభుత్వ, పీపీపీ ఆసుపత్రులను ఒకే గొడుగు కిందకు తీసుకొస్తామని చెప్పారు. దేశంలోనే ఏపీ ఆసుపత్రుల పనితీరు బెస్ట్‌గా ఉండేలా పనిచేయాలని అధికారులకు సూచించారు.
