తిరుమల లడ్డూ వివాదంపై రాహుల్ గాంధీ ఆసక్తికర వ్యాఖ్యలు

తిరుమల లడ్డూ ప్రసాదంపై వివాదం కొనసాగుతోంది. ఈ అంశం దేశవ్యాప్తంగా చర్చనీయాంశం కావడంతో.. జాతీయస్థాయి నేతలు కూడా స్పందిస్తున్నారు. తాజాగా కాంగ్రెస్ అగ్ర నేత రాహుల్ గాంధీ కూడా ఈ వివాదంపై స్పందించారు. తిరుమల శ్రీవారి ప్రసాదం అపవిత్రమైందన్న వార్తలు ఆందోళన కలిగిస్తున్నాయని ఆవేదన వ్యక్తం చేశారు. తిరుమల బాలాజీ భారత్‌పాటు ప్రపంచవ్యాప్తంగా కోట్లాది మంది పూజించే దేవుడని.. లడ్డూ ప్రసాదాన్ని కల్తీ ప్రతి భక్తుడినీ ఆందోళన కలిగిస్తుంది అన్నారు. ఈవిషయాన్ని క్షుణ్ణంగా దర్యాప్తు చేయాల్సిన అవసరం ఉందని అభిప్రాయపడ్డారు. ఈ అంశంపై క్షుణ్ణంగా పరిశీలించాల్సిన అవసరం ఉందన్నారు.దేశంలో పుణ్యక్షేత్రాల పవిత్రతను కాపాడాలి అంటూ ట్వీట్ చేశారు.

తిరుమల లడ్డూలో కల్తీ నెయ్యి వాడకంపై.. కేంద్ర హోంశాఖకు లేఖ రాస్తామన్నారు ఏపీ కాంగ్రెస్‌ అధ్యక్షురాలు వైఎస్‌ షర్మిల. ఈ వ్యవహారంపై సీబీఐ విచారణ జరిపించాలని డిమాండ్‌ చేశారు. అంతేకాదు ఆంధ్రప్రదేశ్ గవర్నర్‌ అబ్దుల్ నజీర్‌ను కలిసి లడ్డూ కల్తీ వ్యవహారంపై ఫిర్యాదు చేస్తామని చెప్పారు. వైఎస్సార్‌సీపీ విశ్వసనీయతను కోల్పోయిందని.. వైఎస్‌ఆర్‌ మంచి పేరు సాధిస్తే.. జగన్‌ చెడ్డపేరు తెచ్చుకున్నారని ధ్వజమెత్తారు. లడ్డూ ప్రసాదంలో బీఫ్ ఆయిల్, ఫిష్ ఆయిల్ కలిశాయని చంద్రబాబు చెప్పారని.. ఇంత పెద్ద విషయం అంత సునాయాసంగా ఎలా చెప్పారన్నారు. వారికి ముందుగానే తెలిస్తే ఎందుకు ఆలస్యంగా ఈ విషయం చెప్పారన్నారు.

తిరుమల శ్రీవారి లడ్డూలో కల్తీ నెయ్యి వాడినట్లు తేలిందన్నారు మాజీ ఎంపీ, కాంగ్రెస్‌ సీనియర్‌ నేత వి హనుమంతరావు. తిరుమల శ్రీవారి లడ్డూ ప్రసాదంలో పంది, చేప కొవ్వు వాడినట్లు తేలిందని.. నెయ్యి సరఫరాకు సంబంధించి రెగ్యులర్ కాంట్రాక్టర్‌కు కాకుండా కొత్త వాళ్లకు ఎందుకు ఇచ్చారని వీహెచ్ ప్రశ్నించారు. ఈ తిరుమల ప్రసాదంలో కల్తీ నెయ్యి వాడకంపై సీబీఐ విచారణ చేయాలని డిమాండ్‌ చేశారు. గత వైఎస్సార్‌సీపీ ప్రభుత్వం ఇంత దారుణానికి ఒడిగడుతుందని అనుకోలేదన్నారు. కల్తీ నెయ్యి వాడిన వాళ్లను దేవుడు క్షమించరని.. వెంటనే ప్రధాని మోదీ, కేంద్ర హోంమంత్రి అమిత్‌ షా సీబీఐ విచారణకు ఆదేశించాలన్నారు. ఈ ఘటనపై భక్తులు తీవ్ర ఆందోళన చెందుతున్నారని.. దేవుడికి అన్యాయం జరిగిందని.. ఏ పార్టీ అయినా విచారణ జరగాల్సిందే అన్నారు హనుమంతరావు.