Red News Navyandhra First Digital News Portal
Food Inflation: జులై నెలలో భారత్‌లో రిటైల్ ద్రవ్యోల్బణం (రిటైల్ ఇన్‌ఫ్లేషన్) అయిదేళ్ల కనిష్టమైన 3.54 శాతానికి దిగొచ్చింది. ఆహార ధరలు తగ్గడం ఇందుకు దోహదం చేసింది. రిజర్వ్ బ్యాంక్ లక్ష్యమైన 4 శాతం కంటే తక్కువ నమోదైంది. ఇలా రావడం గత 5 సంవత్సరాల్లో ఇదే తొలిసారి కావడం గమనార్హం. వినియోగదారుల ధరల సూచీ (హోల్‌సేల్ ఇన్‌ఫ్లేషన్) ఆధారిత ద్రవ్యోల్బణం ఈ సంవత్సరం జూన్ నెలలో 5.08 శాతం కాగా.. 2023 జులైలో 7.44 శాతంగా ఉంది. ఇక ఆహార పదార్థాల ద్రవ్యోల్బణం జూన్ నెలలో 9.36 శాతంగా ఉండగా.. జులై నెలలో 5.42 శాతానికి చేరింది. రిటైల్ ద్రవ్యోల్బణం 4 శాతం (2 శాతం ఎక్కువ లేదా తక్కువ) ఉంచాలని ఆర్బీఐ ఎప్పుడో లక్ష్యంగా నిర్ధరించుకుంది. చివరిసారి 2019 సెప్టెంబర్ నెలలో ఇది 4 శాతానికి కంటే తక్కువ వచ్చింది.
జాతీయ గణాంకాల కార్యాలయం (NSO) లెక్కల ప్రకారం.. జులై నెలలో పాలు సహా ఇతర పాల ఉత్పత్తుల ధరలు 2.99 శాతం పెరగ్గా.. కొవ్వులు, నూనెలు 1.17 శాతం, మసాలా దినుసుల ధరలు 1.43 శాతం చొప్పున తగ్గాయి. కూరగాయల ధరలు 6.83 శాతం ఇంకా తృణధాన్యాల రేట్లు 8.14 శాతం పెరిగాయి. జూన్ నెలలో చూస్తే ఆహార ద్రవ్యోల్బణం 9.36 కాగా.. జులైలో ఇది 5.42 శాతానికి దిగొచ్చింది. ఇక గ్రామీణ ప్రాంతాల్లో సగటు ద్రవ్యోల్బణం 4.1 శాతంగా.. ఇదే సమయంలో పట్టణ ప్రాంతాల్లో 2.98 శాతంగా నమోదైంది. బిహార్‌లో అత్యధికంగా ద్రవ్యోల్బణం 5.87 శాతంగా ఉండగా.. ఝార్ఖండ్‌లో అతి తక్కువగా 1.72 శాతంగా ఉంది.
ఇదే సమయంలో భారత్‌లో పారిశ్రామిక ఉత్పత్తి వృద్ధి ఈ సంవత్సరం జూన్ నెలలో 5 నెలల కనిష్టాన్ని తాకింది. 4.2 శాతంగా నమోదైంది. తయారీ రంగం నిరుత్సాహపరిచినా.. విద్యుత్, గనుల రంగాలు రాణించడం కొంత కలిసొచ్చింది. పారిశ్రామిక ఉత్పత్తి సూచీ (IIP) ఆధారంగా పారిశ్రామికోత్పత్తి వృద్ధిని లెక్కిస్తారు. గతేడాది జూన్ నెలలో ఇది 4 శాతంగా ఉంది. ఈ ఏడాది జనవరిలో 4.2 శాతం, ఫిబ్రవరిలో 5.6 శాతం కాగా.. మార్చిలో 5.4 శాతం, మే నెలలో 6.2 శాతంగా నమోదైంది.
2024-25 ఆర్థిక సంవత్సరం ఏప్రిల్- జూన్ నెలల్లో చూస్తే ఐఐపీ సగటు వృద్ధి 5.2 శాతంగా వచ్చింది. 2023-24 ఇదే సమయంలో నమోదైన 4.7 శాతంతో పోలిస్తే ఇది ఎక్కువే. జూన్ నెలలో తయారీ రంగ ఉత్పత్తి వృద్ధి 2.6 శాతం కాగా.. 2023 జూన్ నెలతో పోలిస్తే తగ్గింది. అప్పుడు ఇది 3.5 శాతంగా ఉండేది. ఇక గనుల ఉత్పత్తి 10.3 శాతం, విద్యుత్ ఉత్పత్తి 8.6 శాతానికి పెరిగాయి.
