Red News Navyandhra First Digital News Portal
Reliance Power Stock: దేశంలోని దిగ్గజ పారిశ్రామిక వేత్తల్లో అనిల్ అంబానీ కూడా ఒకరు. రిలయన్స్ గ్రూప్ అధినేత అయిన ఒకప్పుడు భారత్‌లో అత్యంత ధనవంతుడిగా ఉండేవారు. రిలయన్స్ ఇండస్ట్రీస్ అధినేత, అనిల్ అంబానీ సోదరుడు ముకేశ్ అంబానీ కంటే కూడా ఈయన సంపదే ఎక్కువగా ఉండేది. అయితే కాలక్రమేణా అప్పుల్లో కూరుకుపోయిన అనిల్ సంపద క్రమంగా పతనం అవుతూ వచ్చింది. ఈ క్రమంలోనే కొన్నాళ్ల కిందట అనిల్ అంబానీ దివాళా స్థితికి చేరారు. ఆయన కంపెనీలన్నీ నష్టాల్లోకి మళ్లాయి. దీంతో పలు స్టాక్స్ భారీ స్థాయి నుంచి కనిష్టాలకు పడిపోయాయి. అయితే ఇప్పుడు పరిస్థితి మారిపోయింది. అనిల్ అంబానీ కంపెనీలు మళ్లీ పుంజుకుంటున్నాయి. ఆయన అప్పులు చెల్లిస్తూ వస్తుండటం ఇందుకు కారణంగా చెప్పొచ్చు.
ముఖ్యంగా 2024-25 బడ్జెట్ తర్వాత అనిల్ అంబానీకి చెందిన రిలయన్స్ పవర్ షేర్లు దూసుకెళ్తున్నాయి. 2024, జులై 23న రిలయన్స్ పవర్ స్టాక్ NSE లో రూ. 26.94 వద్ద ఉండేది. అప్పటి నుంచి ప్రతిరోజూ 52 వారాల గరిష్టాన్ని తాకుతూనే ఉంది. బడ్జెట్ తర్వాతి నుంచి చూస్తే ఈ షేరు విలువ రూ. 26.94 నుంచి రూ. 34.54 కు ఎగబాకింది. 5 వరుస సెషన్లలోనే 30 శాతం వరకు పెరగడం విశేషం. ఈ క్రమంలోనే ఈ స్టాక్‌లో ఇన్వెస్ట్ చేసిన వారు లాభాలు ఆర్జిస్తున్నారు.
స్టాక్ మార్కెట్ నిపుణుల ప్రకారం.. ఈ అనిల్ అంబానీ సంస్థ ఇప్పుడు అప్పుల నుంచి విముక్తి పొందినట్లు తెలుస్తోంది. దాదాపు రూ. 800 కోట్ల బకాయిల్ని చెల్లించగా.. ఇప్పుడు ఈ రంగంలోని ఇతర ప్రధాన ప్రైవేట్ రంగ కంపెనీలతో పోటీ పడుతోంది. పవర్, ఇన్‌ఫ్రాస్ట్రక్చర్‌ విభాగాలకు సంబంధించి.. బడ్జెట్‌లో కేంద్రం పెద్దపీట వేయగా.. ఇప్పుడు అనిల్ అంబానీ సంస్థ కూడా దీని వల్ల లబ్ధి పొందుతుందని అంచనా వేస్తున్నారు. ఈ క్రమంలోనే ఇన్వెస్టర్లు రిలయన్స్ పవర్ షేర్లను కొనుగోలు చేస్తున్నట్లు తెలుస్తోంది. స్టాక్ టార్గెట్ ప్రైస్‌ను కూడా బ్రోకరేజీలు పెంచుకుంటూ పోతుండటం విశేషం.
2008 సంవత్సరం మే 23న ఈ స్టాక్ ధర రూ. 274.84 వద్ద గరిష్ట స్థాయిలో ఉండేది. అప్పటి నుంచి వరుసగా పడిపోయిన షేరు ఏకంగా 99 శాతం పతనంతో రూ. 1.13 స్థాయికి కూడా చేరింది. అక్కడి నుంచి కోలుకోవడం కష్టంగానే అనిపించింది. కానీ అన్ని ఒడుదొడుకుల్ని ఎదుర్కొంటూ.. ఏకంగా 3 వేల శాతం పెరిగి ప్రస్తుత స్థాయికి చేరింది. దీంతో ఇన్వెస్టర్లు భారీ లాభాలు పొందారు. ఈ క్రమంలో నాలుగేళ్లలోనే లక్ష పెట్టుబడిని రూ. 30 లక్షలు చేయడం విశేషం.
