వెంకటేష్‌, అనిల్ రావిపూడి సినిమా.. సంక్రాంతికి డౌటేనా?

టాలీవుడ్ సినిమాలకు సంక్రాంతి సీజన్‌ అత్యంత కీలకం. అందుకే స్టార్‌ హీరోల నుంచి చిన్న హీరోల వరకు సంక్రాంతికి రావాలని భావించే వారు ఎక్కువ మంది ఉంటారు. గత ఆరు నెలలుగా సంక్రాంతి సీజన్ సినిమాల గురించి మీడియాలో వార్తలు వస్తు ఉన్నాయి. మొదట 2025 సంక్రాంతికి చిరంజీవి విశ్వంభర, వెంకటేష్‌, అనిల్ రావిపూడి మూవీ, నాగార్జున మూవీ, రవితేజ సినిమాలు రాబోతున్నట్లు ప్రకటన వచ్చాయి. సంక్రాంతి దగ్గర పడుతున్న కొద్ది ఒక్కో సినిమా చొప్పున తప్పుకుంటూ కొత్త సినిమాలు బరిలోకి వస్తున్నాయి. ఇటీవల మెగాస్టార్‌ చిరంజీవి విశ్వంభర సినిమాను వాయిదా వేస్తున్నట్లుగా ప్రకటించారు. షూటింగ్‌ ఇంకా పూర్తి అవ్వక పోవడంతో గ్రాఫిక్స్ వర్క్ కి టైమ్ పట్టనున్న కారణంగా సంక్రాంతి బరి నుంచి విశ్వంభర తొలగిందనే ప్రచారం జరుగుతోంది.

చిరంజీవి విశ్వంభర సినిమా తప్పుకోవడంతో ఆ స్థానంలో రామ్‌ చరణ్‌, శంకర్ దర్శకత్వంలో రూపొందుతున్న ‘గేమ్‌ ఛేంజర్‌’ సినిమాను తీసుకు రాబోతున్నట్లుగా అధికారికంగా ప్రకటన వచ్చింది. చిరంజీవి ఫ్యాన్స్‌ నిరుత్సాహంలో ఉన్న సమయంలో తాజాగా వెంకటేష్‌, అనిల్ రావిపూడి సినిమా విడుదల సైతం వాయిదా పడబోతుందనే ప్రచారం జరుగుతోంది. దిల్ రాజు నిర్మిస్తున్న ఈ సినిమాను సంక్రాంతికి తీసుకు రావాలని మొన్నటి వరకు చాలా పట్టుదలతో షూట్‌ చేశారట. కానీ తాజాగా అందుతున్న సమాచారం ప్రకారం షూటింగ్‌ ఎంత స్పీడ్‌ గా చేసినా డిసెంబర్ వరకు పూర్తి అయ్యే పరిస్థితి లేదని, అందుకే సంక్రాంతి బరి నుంచి తప్పించాలనే నిర్ణయానికి వచ్చారని తెలుస్తోంది.

వెంకటేష్‌, అనిల్‌ రావిపూడి కాంబినేషన్‌లో వచ్చిన ఎఫ్‌2, ఎఫ్‌ 3 సినిమాలు మంచి విజయాలను సొంతం చేసుకున్నాయి. అంతే కాకుండా అనిల్ రావిపూడి గత చిత్రాలు భగవంత్ కేసరితో పాటు ఇతర సినిమాలు మంచి విజయాలను సొంతం చేసుకున్న కారణంగా వీరి కాంబో మూవీపై అంచనాలు భారీగా ఉన్నాయి. అంచనాలకు తగ్గట్లుగా అనిల్ రావిపూడి కామెడీ ఎంటర్‌టైనర్‌గా సినిమాను రూపొందిస్తున్నారు. భారీ అంచనాల నడుమ రూపొందుతున్న ఈ సినిమా విడుదల వాయిదా పడటంతో వెంకటేష్ ఫ్యాన్స్ ఆవేదన వ్యక్తం చేస్తున్నారు. సోషల్‌ మీడియాలో ఇప్పటికే మొదలైన ప్రచారంపై క్లారిటీ ఇవ్వాలంటే వెంకటేష్ ఫ్యాన్స్ నిర్మాణ సంస్థను ట్యాగ్‌ చేస్తూ ట్వీట్స్ చేస్తున్నారు. దిల్ రాజు బ్యానర్‌ లోనే గేమ్‌ ఛేంజర్ రూపొందుతున్న విషయం తెల్సిందే. కనుక రెండు సినిమాలను సంక్రాంతికి విడుదల చేయడం కష్టం కనుక దిల్‌ రాజు ఒక సినిమా వాయిదా వేసే అవకాశాలు ఉన్నాయి.