ట్రైన్ ప్రయాణికులకు అలర్ట్.. హైదరాబాద్ నుంచి వెళ్లే పలు రైళ్లు రద్దు, వివరాలివే..

హైదరాబాద్, సికింద్రాబాద్‌ల నుంచి వివిధ ప్రాంతాలకు వెళ్లే ట్రైన్ ప్రయాణికులకు సౌత్ సెంట్రల్ రైల్వే అధికారులు అలర్ట్ జారీ చేశారు. పలు ట్రైన్లను రద్దు చేస్తున్నట్లు అధికారులు ప్రకటన విడుదల చేశారు. సికింద్రాబాద్, హైదరాబాద్‌ రైల్వే డివిజన్ల పరిధిలో పలు ప్రాంతాల్లో నిర్వహణ పనుల కారణంగా ట్రైన్లు రద్దు చేస్తున్నట్లు సౌత్ సెంట్రల్ రైల్వే అధికారులు ప్రకటించారు. రద్దయిన ట్రైన్ల వివరాలను వెల్లడించారు. వరంగల్‌- హైదరాబాద్‌ మెమూ, కాజీపేట- బల్లార్ష, సికింద్రాబాద్‌- వరంగల్ ట్రైన్లు సెప్టెంబరు 1 నుంచి అక్టోబరు 30 వరకు మెుత్తం నెల రోజుల పాటు క్యాన్సిల్ చేశారు.

బల్లార్ష- కాజీపేట ట్రైన్‌ను సెప్టెంబరు 2 నుంచి అక్టోబరు 1 వరకు రద్దు చేశారు. సిర్పూర్‌ టౌన్‌- కరీంనగర్, కరీంనగర్‌- బోధన్‌ మెమూ ట్రైన్లను సెప్టెంబరు 1 నుంచి 30 వరకు రద్దు చేశారు. బోధన్‌- కరీంనగర్‌ మెము ట్రైన్‌ను సెప్టెంబరు 2 నుంచి అక్టోబరు 1 వరకు రద్దు చేశారు. కాచిగూడ- నడికుడి, నడికుడి- కాచిగూడ ట్రైన్లు సెప్టెంబరు 1-30 వరకు రద్దు చేసినట్లు సౌత్ సెంట్రల్ రైల్వే సీపీఆర్వో శ్రీధర్‌ మంగళవారం (ఆగస్టు 20) ఓ ప్రకటన విడుదల చేశారు.

హెచ్‌ఎస్‌ నాందేడ్‌- రాయచూరు ట్రైన్ సెప్టెంబరు 1 నుంచి 30 వరకు రద్దు చేస్తున్నట్లు ప్రకటించారు. తాండూరు-రాయచూరు మధ్య ఈ ట్రైన్లు పాక్షికంగా క్యాన్సిల్ చేసినట్లు వెల్లడించారు. అలాగే భద్రాచలం రోడ్‌- బల్లార్ష, సిర్పూర్‌టౌన్‌- భద్రాచలం ట్రైన్లను సెప్టెంబరు 1 నుంచి 30 వరకు కాజీపేట స్టేషన్‌లో స్టాపేజిని తొలగించినట్లు తెలిపారు. ట్రైన్ ప్రయాణికులు ఈ విషయాలను గమనించి తమ ప్రయాణాలను కొనసాగించాలన్నారు. నిర్వహణ పనుల తర్వాత ట్రైన్లు యథావిధిగా నడుస్తాయని అధికారులు తెలిపారు.

ఇక ఎస్సీ, ఎస్టీ రిజర్వేషన్లపై సుప్రీం కోర్టు కీలక తీర్పును ఇచ్చిన సంగతి తెలిసిందే. వర్గీకరణకు సుప్రీం గ్రీన్ సిగ్నల్ ఇచ్చింది. ఆయా రాష్ట్రాలకు అధికారం ఉంటుందని తీర్పును వెలువరించింది. ఈ నేపథ్యంలో సుప్రీం నిర్ణయానికి నిరసనగా నేడు భారత్ బంద్‌కు ఆరక్షన్ బచావో సంఘర్ష్ సమితి పిలుపునిచ్చింది. దీంతో పలు చోట్ల ట్రైన్ ప్రయాణాలకు అంతరాయం ఏర్పడే ఛాన్స్ ఉంది. ఈ మేరకు ట్రైన్ ప్రయాణికులు తమ జర్నీని ప్లాన్ చేసుకుంటే బావుంటుంది.