సుకన్య సమృద్ధి, PPF స్కీమ్స్ కొత్త వడ్డీ రేట్లు.. కేంద్రం ప్రకటన.. ఫుల్ లిస్ట్ ఇదే!

Small Savings Schemes: పోస్టాఫీసు ద్వారా అందిస్తోన్న చిన్న మొత్తాల పొదుపు పథకాలైన సుకన్య సమృద్ధి యోజన, పీపీఎఫ్, సీనియర్ సిటిజన్ సేవింగ్స్ స్కీమ్, మహిళా సమ్మాన్ సేవింగ్స్ స్కీమ్ వంటి పథకాల వడ్డీ రేట్లను ప్రకటించింది కేంద్రం. అక్టోబర్- డిసెంబర్ 2024 త్రైమాసికానికి గానూ పాత వడ్డీ రేట్లనే కొనసాగిస్తున్నట్లు తెలిపింది. వరుసగా మూడోసారి కీలక వడ్డ రేట్లను యథాతథంగా కొనసాగించడం గమనార్హం. అయితే, ఈసారి రిజర్వ్ బ్యాంక్ ఆఫ్ ఇండియా వడ్డీ రేట్లలో కోత పెడుతుందన్న అంచనాలతో చిన్న మొత్తాల పొదుపు పథకాల వడ్డీ రేట్లను సైతం తగ్గిస్తారనే వార్తలు వచ్చాయి. కానీ, ప్రభుత్వం వడ్డీ రేట్లను తగ్గించడం, పెంచడం వంటివి ఏం చేయకుండా యథాతథంగా కొనసాగించడం గమనార్హం.

పీపీఎఫ్, సుకన్య యోజన, నేషనల్ సేవింగ్స్ సర్టిఫికెట్, మహిళా సమ్మాన్ సేవింగ్స్ స్కీమ్, టర్మ్ డిపాజిట్ల వంటి పథకాలపై వడ్డీ రేట్లను సవరించకుండా యథాతథంగా కొనసాగించడం ఇది మూడోసారి. జులై- సెప్టెంబర్ త్రైమాసికంలో ఇచ్చిన వడ్డీ రేట్లనే ఈ అక్టోబర్- డిసెంబర్ త్రైమాసికంలోనూ కొనసాగిస్తూ కేంద్ర ఆర్థిక మంత్రిత్వ శాఖ సోమవారం నోటిఫికేషన్ జారీ చేసింది. మరోసారి పబ్లిక్ ప్రావిడెంట్ ఫండ్ ఇన్వెస్టర్లకు నిరాశే ఎదురైందని చెప్పవచ్చు. ఎందుకంటే చాలా త్రైమాసికాలుగా పీపీఎఫ్ వడ్డీ రేటును యథాతథంగా కొనసాగిస్తూ వస్తోంది కేంద్రం.

కొత్త వడ్డీ రేట్లు ఇవే..

• సుకన్య సమృద్ధి యోజన పథకంపై అక్టోబర్- డిసెంబర్ త్రైమాసికానికి 8.2 శాతం వద్ద యథాతథంగా కొనసాగిస్తున్నట్లు కేంద్ర ఆర్థిక మంత్రిత్వ శాఖ నోటిఫికేషన్‌లో పేర్కొంది.
• ఇక మూడేళ్ల టర్మ్ డిపాజిట్లపై 7.1 శాతం వడ్డీ లభిస్తున్నట్లు తెలిపింది.
• పబ్లిక్ ప్రావిడెంట్ ఫండ్ పథకం (పీపీఎఫ్) స్కీమ్‌పై ఎప్పటిలాగే 7.1 శాతం వడ్డీ ఇస్తోంది.
• పోస్టాఫీసు సేవింగ్స్ పథకాలపై 4 శాతం వడ్డీ అందిస్తోంది.
• కిసాన్ వికాస్ పత్ర స్కీమ్ ఇన్వెస్టర్లకు 7.5 శాతం మేర వడ్డీ అందిస్తోంది. ఈ స్కీమ్ 115 నెలల మెచ్యూరిటీ ఉంటుంది.
• నేషనల్ సేవింగ్స్ సర్టిఫికెట్ పథకంపై 7.7 శాతం వడ్డీ ఇస్తోంది.
• ఇక మంత్లీ ఇన్‌కమ్ స్కీమ్ ద్వారా 7.4 శాతం వడ్డీ అందిస్తున్నట్లు ఆర్థిక మంత్రిత్వ శాఖ తెలిపింది.