దెబ్బకు దిగొచ్చిన ఐటీ కంపెనీ.. రూ.20 వేల జీతంపై క్లారిటీ.. ఏం చెప్పిందంటే?

Congnizant: ఉద్యోగార్థుల నుంచి ట్రోల్స్ సెగ తగలడంతో ప్రముఖ ఐటీ కంపెనీ కాగ్నిజెంట్ టెక్నాలజీస్ దిగొచ్చింది. వార్షిక వేతనం రూ.2.52 లక్షలతో ఉద్యోగాల ప్రకటనపై క్లారిటీ ఇచ్చింది. ఐటీ ఫ్రెషర్ల నుంచి ఉద్యోగాలకు దరఖాస్తులు ఆహ్వానిస్తూ కొద్ది రోజుల క్రితం ఇచ్చిన జాబ్ ఆఫర్ వైరల్‌గా మారింది. దానిపై నెటిజన్లు తీవ్రంగా మండిపడ్డారు. నాలుగు ఇళ్లల్లో పని చేస్తే అంతకన్నా ఎక్కువ సంపాదించొచ్చు అంటూ ట్రోల్స్ చేశారు. సోషల్ మీడియాలో కాగ్నిజెంట్ జాబ్ ఆఫర్లపై ఆగ్రహం వ్యక్తం చేశారు. ఈ క్రమంలో కంపెనీ దిగిరాక తప్పలేదు. రూ.20 వేల శాలరీపై క్లారిటీ ఇచ్చింది.

ఈ మేరకు ఆదివారం రోజున ఓ ప్రకటన జారీ చేసింది కాగ్నిజెంట్ టెక్నాలజీస్. సోషల్ మీడియాలో వైరల్ అయిన రూ.2.52 లక్షల వార్షిక శాలరీ ఆఫర్ అనేది నాన్ ఇంజనీరింగ్ గ్రాడ్యుయెట్స్ కోసమని పేర్కొంది. మూడేళ్ల అండర్ గ్రాడ్యుయేట్స్ కోసం మాత్రమేనని తెలిపింది. తాము చేసిన ఈ జాబ్ ఆఫర్ పూర్తిగా అపార్థం చేసుకున్నారని తెలిపింది. ఈ మేరకు కాగ్నిజెంట్ ఎగ్జిక్యూటివ్ వైస్ ప్రెసిడెంట్ సూర్య గుమ్మడి కీలక వ్యాఖ్యలు చేశారు. ‘ మూడు సంవత్సరాల అండర్ గ్రాడ్యుయేట్ డిగ్రీతో నాన్ ఇంజనీరింగ్ పట్టా పొందిన ప్రతిభావంతుల కోసం మా ఇటీవలి ఉద్యోగ పోస్టింగ్ ను తప్పుగా అర్థం చేసుకున్నారు. ఈ ఉద్యోగ పోస్టింగ్ ఏడాదికి రూ.2.52 లక్షల ప్యాకేజీతో కేవలం మూడేళ్ల అండర్ గ్రాడ్యుయేట్ డిగ్రీ ఉన్న అభ్యర్థులకు మాత్రమే, ఇంజనీరింగ్ గ్రాడ్యుయేట్లకు కాదు.’ అని స్పష్టం చేశారు.

మరోవైపు.. ఇంజినీరింగ్ గ్రాడ్యుయేట్లకు ఉద్యోగాల కోసం ప్రారంభ శాలరీ ప్యాకేజీ రూ.4 లక్షల నుంచి రూ.12 లక్షలుగా ఉందని కాగ్నిజెంట్ స్పష్టం చేసింది. వారి నైపుణ్యాల ఆధారంగా శాలరీ నిర్ణయం తీసుకునే అవకాశం ఉంటుందని తెలిపింది. ఇంజినీరింగ్ గ్రాడ్యుయేట్లకు తాము అందించే పరిహారం ఐటీ సేవల సెక్టార్‌లో ఉన్న కాంపిటీషన్ల ప్రకారమే ఉందని తెలిపింది. మరోవైపు.. జీతాల పెంపుపై ఇటీవల చేసిన ప్రకటన సైతం విమర్శలకు దారి తీసిందని చెప్పవచ్చు. 1- 5 శాతం కంటే తక్కువ జీతం పెంపుదల ఉంటుందని తెలపడం గమనార్హం.