అదానీ గ్రూప్‌లో సెబీ చీఫ్‌కు వాటాలు.. మరో బాంబ్ పేల్చిన హిండెన్‌బర్గ్

Sebi Chief: గతేడాది మొదట్లో గౌతమ్ అదానీకి చెందిన అదానీ గ్రూప్‌పై సంచలన ఆరోపణలు గుప్పించి వార్తల్లో నిలిచిన హిండెన్‌బర్గ్ రీసెర్చ్.. తాజాగా మరోసారి అదే పని చేసింది. శనివారం ఉదయం ట్విటర్‌లో హిండెన్‌బర్గ్ రీసెర్చ్ చేసిన ఓ పోస్ట్ తీవ్ర ఉత్కంఠను రేపింది. సమ్‌థింగ్‌ బిగ్‌ సూన్‌ ఇండియా అని హిండెన్‌బర్గ్ రీసెర్చ్ ట్వీట్ చేయడంతో.. గతంలో అదానీ కంపెనీపై పడి భారత స్టాక్ మార్కెట్లను కకావికలం చేసిన ఆ సంస్థ ఇప్పుడు ఏ కంపెనీపై పడనుందనే భయాలు నెలకొన్నాయి. అయితే ఆ సంస్థ చేసిన ట్వీట్‌కు శనివారం రాత్రి సస్పెన్స్‌ను వీడి.. అసలు విషయం చెప్పింది. అయితే సెక్యూరిటీస్ అండ్ ఎక్స్ఛేంజ్‌ బోర్డ్ ఆఫ్ ఇండియా – సెబీ ఛైర్‌పర్సన్‌ మాధబి పురి బచ్‌పై హిండెన్‌బర్గ్ రీసెర్చ్ సంస్థ సంచలన ఆరోపణలు చేసింది.

సెబీ ఛైర్‌పర్సన్‌ మాధబి పురి బచ్‌కు, ఆమె భర్త ధావల్‌ బచ్‌కు అదానీ గ్రూప్‌లో వాటాలు ఉన్నాయని తాజాగా హిండెన్‌బర్గ్‌ రీసెర్చ్‌ బాంబు పేల్చింది. అదానీ షేర్ల విలువలు కృత్రిమంగా పెంచేందుకు వినియోగించిన మారిషస్‌ ఫండ్‌లలో మాధబి పురి, ఆమె భర్తకు వాటాలు ఉన్నాయని ఆరోపించింది. గౌతమ్ అదానీకి చెందిన మారిషస్, ఆఫ్‌షోర్‌ షెల్‌ సంస్థల వివరాలను తెలుసుకోవడంలో సెబీ ఆసక్తి చూపకపోవడం తమను ఆశ్చర్యపరిచిందని హిండెన్‌బర్గ్ వెల్లడించింది. నియంత్రణ సంస్థల జోక్యం లేకుండా గౌతమ్ అదానీ పూర్తి నమ్మకంతో కార్యకలాపాలు సాగించడం తాము గమనించినట్లు తెలిపింది. అయితే అదానీ సంస్థలతో సెబీ ఛైర్‌పర్సన్‌ మాధబి పురికి ఉన్న సంబంధాలను బట్టి ఈ విషయాన్ని అర్థం చేసుకోవచ్చని హిండెన్‌బర్గ్ ఆరోపించింది.

విజిల్‌బ్లోయర్‌ పత్రాల ప్రకారం.. గౌతమ్‌ అదానీ సోదరుడు వినోద్‌ అదానీ నియంత్రణలో కొన్ని ఆఫ్‌షోర్‌ బెర్ముడా, మారిషస్‌ ఫండ్‌లు ఉన్నాయని హిండెన్‌బర్గ్ పేర్కొంది. వీటిలో మాధబి పురి, ఆమె భర్త ధావల్‌ బచ్‌లకు వాటాలు ఉన్నాయని హిండెన్‌బర్గ్‌ రీసెర్చ్ విడుదల చేసిన తాజా నివేదికలో సంచలన ఆరోపణలు చేసింది. మాధబి పురి, ధావల్ బచ్ దంపతులకు అదానీ కంపెనీల్లో వాటాల నికర విలువ 10 మిలియన్‌ డాలర్లు అంటే మన భారత కరెన్సీలో సుమారు రూ.83 కోట్ల వరకు ఉండొచ్చని తెలిపింది. అయితే హిండెన్‌బర్గ్‌ రీసెర్చ్ చేసిన వ్యాఖ్యలపై సెబీ నుంచి ఇంకా స్పందన లభించలేదు.

అదానీ గ్రూప్‌పై గతేడాది జనవరిలో హిండెన్‌బర్గ్‌ రీసెర్చ్ సంస్థ వెలువరించిన నివేదిక.. స్టాక్ మార్కెట్లలోనే కాకుండా మన దేశ రాజకీయాల్లోనే పెను దుమారాన్ని రేపిన విషయం తెలిసిందే. కంపెనీల షేర్ల విలువను కృత్రిమంగా పెంచేందుకు అదానీ గ్రూప్ అవకతవకలకు పాల్పడిందని.. కంపెనీల ఖాతాల్లోనూ మోసాలు చేస్తోందని హిండెన్‌బర్గ్ ఆరోపించింది. ఈ ఒక్క హిండెన్‌బర్గ్ రీసెర్చ్ ఇచ్చిన నివేదికతో అదానీ గ్రూప్‌ సంస్థల మార్కెట్‌ విలువ 150 బిలియన్ డాలర్ల మేర పతనమైంది. ఆ తర్వాత సెబీ, సుప్రీం కోర్టులు కూడా అదానీ గ్రూప్‌కు క్లీన్‌చిట్‌ ఇవ్వగా.. తిరిగి సాధారణ స్థితికి వచ్చాయి. ఇలాంటి తరుణంలో మరోసారి ఏకంగా సెబీ ఛైర్‌పర్సన్, అదానీ గ్రూప్‌లపై హిండెన్‌బర్గ్ సంస్థ చేసిన ఆరోపణలు తీవ్ర చర్చనీయాంశంగా మారాయి. ఈ ప్రకటనతో సోమవారం స్టాక్ మార్కెట్ల పరిస్థితి ఎలా ఉండబోతోందా అని మదుపర్లలో తీవ్ర భయాందోళనలు నెలకొన్నాయి.