పెళ్లి కాలేదు కానీ.. 12 దేశాల్లో 100 మందికిపైగా పిల్లలు: టెలిగ్రామ్ సీఈఓ పావెల్ దురోవ్
Telegram: పెళ్లి కాకుండానే తాను వంద మందికిపైగా పిల్లలకు తండ్రిని అయినట్లు టెలిగ్రామ్ సీఈఓ పావెల్ దురోవ్ సంచలన విషయాన్ని బయటపెట్టాడు. ప్రపంచవ్యాప్తంగా తన సంతానం విస్తరించి ఉందని ఆయన స్పష్టం చేశారు. ప్రపంచంలోని 12 దేశాల్లో తనకు 100 మంది కంటే ఎక్కువ మంది పిల్లలు ఉన్నారని పావెల్ దురోవ్ చేసిన వ్యాఖ్యలపై ప్రస్తుతం సోషల్ మీడియాలో తెగ చర్చ జరుగుతోంది. అయితే తాను అంత మంది పిల్లలకు ఎలా తండ్రిని అయ్యానో కూడా ఆయన పూర్తి వివరాలు వెల్లడించారు. తన టెలిగ్రామ్ ఛానెల్లో సుదీర్ఘ పోస్ట్ చేసిన పావెల్ దురోవ్.. తాను బయోలాజికల్గా అంత మంది పిల్లలకు తండ్రిని అయినట్లు చెప్పారు.
39 ఏళ్ల వయసు ఉన్న పావెల్ దురోవ్ ఇంకా పెళ్లి చేసుకోలేదు. కానీ తన వీర్యం ద్వారా ఇప్పటివరకే ప్రపంచంలోని ఎన్నో దేశాల్లో 100 మందికి పైగా పిల్లలకు తండ్రి అయ్యారు. అయితే దీని వెనుక బలమైన కారణం ఉందని ఆయన వెల్లడించారు. 15 ఏళ్ల క్రితం తాను 24 ఏళ్ల వయసులో ఉన్నపుడు.. తన ఫ్రెండ్ చెప్పిన ఒక విషయంతో తాను ఈ వీర్య దానం (Sperm Donar) చేయడం ప్రారంభించినట్లు పావెల్ దురోవ్ చెప్పారు. అయితే తన ఫ్రెండ్కు, అతని భార్యకు పిల్లలు పుట్టే అవకాశం లేదని ఆ సమయంలో డాక్టర్లు తేల్చి చెప్పారని.. అయితే అదే విషయాన్ని తనముందు ఉంచిన తన మిత్రుడు.. తనను వీర్య దానం చేయమని కోరినట్లు తెలిపారు.
అయితే మొదట తన ఫ్రెండ్ చెప్పింది విని తాను ఆశ్చర్యపోయానని.. సంతానం కోసం తనను వీర్య దానం చేయాలని కోరడంతో బాగా నవ్వుకున్నట్లు పావెల్ దురోవ్ వెల్లడించారు. ఆ తర్వాతే తనకు మెల్లమెల్లగా సంతానలేమి అనేది ఎంత పెద్ద సమస్య అనేది అర్థం అయిందని చెప్పారు. దీంతో తాను అప్పటి నుంచి వీర్యదానం చేయడం మొదలుపెట్టినట్లు ఆయన టెలిగ్రామ్ పోస్ట్లో తెలిపారు. ఆరోగ్యకరమైన వీర్యకణాలు దానం చేసేవారు చాలా తక్కువమంది ఉన్నారని తనకు ఓ డాక్టర్ చెప్పారని.. అదే సమయంలో సంతానలేమితో బాధపడే భార్యా భర్తలు ఎంతో మంది ఉన్నారని తాను తెలుసుకున్నట్లు పావెల్ దురోవ్ పేర్కొన్నారు.
దీంతో వీర్యాన్ని దానం చేసి సంతానం లేని దంపతులకు సాయం చేయడం మన సామాజిక బాధ్యత అని ఆయన గుర్తు చేశారు. వెంటనే తాను స్పెర్మ్ డొనేషన్లో రిజిస్టర్ చేసుకున్నానని.. అలా అప్పటి నుంచి ఇప్పటివరకు 12 దేశాల్లో 100 మందికి పైగా దంపతులకు తన వీర్యంతో పిల్లలు కలిగేలా చేసినట్లు ఆయన వెల్లడించారు. అయితే తాను వీర్య దానం చేయడం ఆపేసి చాలా సంవత్సరాలు అవుతోందని.. కానీ అప్పుడు ఫ్రీజ్ చేసిన తన వీర్య కణాల ద్వారా ఎన్నో కుటుంబాలకు సంతానం కలిగిస్తున్నారని తెలుసుకుని తాను సంతోషపడినట్లు పావెల్ దురోవ్ చెప్పారు.
అయితే ఇన్నేళ్ల తర్వాత ఈ విషయాన్ని బయటపెట్టడంతో వల్ల కొన్ని సమస్యలు ఉన్నప్పటికీ.. ఇలా వీర్య దానంపై సమాజంలో అవగాహన కల్పించాల్సిన అవసరం ఉందని.. అందుకే దీన్ని బహిర్గత పరిచినట్లు పావెల్ దురోవ్ చెప్పారు. స్పెర్మ్ డోనర్ అయినందుకు తానం పశ్చత్తాపపడట్లేదని.. ప్రస్తుత పరిస్థితుల్లో ప్రపంచవ్యాప్తంగా సంతానలేమి సమస్య తీవ్రంగా వేధిస్తోందని ఆయన వెల్లడించారు. సంతానం లేక కుమిలిపోతున్న జంటలకు.. పిల్లలను అందించి వారికి సంతోషాలు కలిగించినందుకు తాను గర్వపడుతున్నట్లు చెప్పారు. మరింత ఎక్కువమంది వీర్యం దానం చేసేందుకు ముందుకురావాలని తాను కోరుతున్నట్లు పావెల్ దురోవ్ తన టెలిగ్రామ్ ఛానెల్లో పేర్కొన్నారు.
