Bengaluru: నన్ను జైల్లో పెట్టండి కానీ.. భార్యతో ఉండలేను.. వేధింపులతో ఇంటి నుంచి పారిపోయిన టెక్కీ!
భార్య వేధింపులకు తాళలేక ఇళ్లు వదిలి పారిపోయాడు ఓ సాఫ్ట్వేర్ ఇంజినీర్. ఈ ఘటన దేశ ఐటీ రాజధాని బెంగళూరు నగరంలో చోటుచేసుకుంది. భర్త కనిపించకపోవడంతో భార్య పోలీసులకు ఫిర్యాదు చేసింది. దీంతో కేసు నమోదుచేసిన పోలీసులు.. అతడు నొయిడాలో ఉన్నట్టు గుర్తించారు. నచ్చజెప్పి అతడ్ని బెంగళూరుకు తీసుకురాగా.. భార్య నన్ను చిత్రహింసలకు గురిచేస్తోందని వాపోయాడు. అంతేకాదు, జైలుకి వెళ్లమన్నా వెళ్తా కానీ ఆమెతో జీవితం పంచుకోలేనని తెగేసి చెప్పాడు. వివరాల్లోకి వెళ్తే.. ఉత్తర బెంగళూరులో భార్యతో కలిసి నివాసం ఉంటోన్న సాఫ్ట్వేర్ ఇంజినీర్ విపిన్ గుప్తా.. ఆగస్టు 4 నుంచి కనిపించకుండా పోయాడు. ఏటీఎంకి వెళ్లి నగదు తీసుకొస్తానని చెప్పి బయటకొచ్చిన అతడు.. తిరిగి ఇంటికి రాలేదు. దీంతో అతడి భార్య పోలీసులకు పోలీసులకు ఫిర్యాదు చేసింది.
తన భర్తను ఎవరో అపహరించి ఉంటారని అనుమానం వ్యక్తం చేసింది. ఆమె సోషల్ మీడియాలో వీడియోలు, ఫొటోలు షేర్ చేసి… భర్త కనిపించడం లేదని, సాయం చేయాలని కోరింది. దీంతో పోలీసులు రంగంలోకి దిగి అతడి కోసం గాలించారు. ఫోన్ స్విఛాఫ్ చేయడంతో ఎక్కడున్నాడో తెలియరాలేదు. బస్టాండ్లు, రైల్వే స్టేషన్ల వద్ద ఉన్న సీసీటీవీ ఫుటేజ్లను పరిశీలించారు. చివరకు నోయిడాలో ఆ యువకుడు ఓ సిమ్ కార్డు కొన్నట్టు గుర్తించి, దాని ఆధారంగా ట్రేస్ చేశారు.
నొయిడాలోని మాల్లో సినిమా చూసి బయటకు వస్తుండగా అతడ్ని గుర్తించిన కర్ణాటక పోలీసులు చుట్టుముట్టారు. ఇంటికి రావడానికి అతడు నిరాకరించాడు. చాలా సేపు బతిమాలాడిన తర్వాత ఒప్పుకున్నాడు. అయితే..భార్య తనను పదేపదే వేధిస్తోందని వాపోయాడు. ఆమెతో తనకు మూడేళ్ల కిందట పరిచయం అయ్యిందని, తాను ఆమెకి రెండో భర్తనని తెలిపాడు. అప్పటికే మొదటి భర్త నుంచి విడాకులు తీసుకున్న ఆమెకు 12 ఏళ్ల కూతురు ఉందని చెప్పాడు. అయినా, పెళ్లికి అంగీకరించానని, మాకు 8 నెలల కుమార్తె ఉందని వివరించాడు..
తనకు కనీసం స్వేచ్ఛనివ్వడం లేదని, ప్రతి చిన్న దానికీ నోరు చేస్తోందని అన్నారు. ఆమె చెప్పిన డ్రెస్ వేసుకోవాలని, కనీసం టీ తాగడానికి కూడా బయటకు వెళ్లలేకపోతున్నానని కన్నీటిపర్యంతమయ్యాడు. ఇక, ఆగస్టు 4న ఇంటి నుంచి వచ్చేసిన తర్వాత ఎవరూ గుర్తుపట్టకుండా ఉండేందుకు గెటప్ మార్చాడు. బెంగళూరు నుంచి నేరుగా బస్సులో తిరుపతికి వెళ్లి గుండుకొట్టించుకుని… అటు నుంచి అటు రైలెక్కి భువనేశ్వర్ వెళ్లాడు. అక్కడ ఒక్క రోజు ఉండి ఢిల్లీ, నొయిడాకు వెళ్లిపోయాడు. అతడ్ని నొయిడా నుంచి తీసుకురావడానికి పోలీసుల తల ప్రాణం తోకలోకి వచ్చింది.
