కేంద్రం నుంచి రూ.250 కోట్ల ఆర్డర్.. దూసుకెళ్లిన స్టాక్.. లక్ష పెడితే రూ.6 లక్షలు!
Oriana Power: స్మాల్ క్యాప్ కేటగిరి పవర్ సెక్టార్ స్టాక్ ఒరియానా పవర్ లిమిటెడ్ షేరు ఇవాళ్టి స్టాక్ మార్కెట్ ట్రేడింగ్ సెషన్లో 5 శాతం మేర లాభపడి అప్పర్ సర్క్యూట్లో లాక్ అయింది. కేంద్ర ప్రభుత్వ పెట్రోలియం కంపెనీ భారత్ పెట్రోలియం కార్పొరేషన్ నుంచి భారీ ఆర్డర్ దక్కించుకున్నట్లు ప్రకటించిన క్రమంలో ఈ కంపెనీ షేర్ పరుగులు పెట్టింది. కొనుగోలు చేసేందుకు మదుపరులు ఆసక్తి చూపడంతో అప్పర్ సర్క్యూట్లో లాక్ అయింది. అలాగే ఈ కంపెనీ షేరు గత ఆరు నెలల కాలంలోనే ఏకంగా 171 శాతం మేర లాభాలు అందించి మల్టీబ్యాగర్ స్టాక్గా నిలిచింది.
కంపెనీ ఎక్స్చేంజ్ ఫైలింగ్ వివరాలు గమనిస్తే.. ప్రభుత్వ రంగ పెట్రోలియం కంపెనీ భారత్ పెట్రోలియం కార్పొరేషన్ ఆఫ్ ఇండియా బీపీసీఎల్ నుంచి రూ. 248 కోట్ల భారీ ఆర్డర్ లభించినట్లు కంపెనీ వెల్లడించింది. ఈ కొత్త ఆర్డర్లో భాగంగా 52 మెగా వాట్ల సోలార్ విద్యుత్తు ప్లాంట్ ఏర్పాటు చేయాల్సి ఉందని తెలిపింది. అలాగే సీటీయూ ఆమోదంతో పాటు ట్రాన్స్మిషన్ లైన్స్ ఏర్పాటు ఆపైన 5 ఏళ్లపాటు నిర్వహణ సేవలు అందించనున్నట్లు కంపెనీ తెలిపింది. ఈ క్రమంలో ఒరియానా పవర్ కంపెనీ స్టాక్ ఫోకస్ లోకి వచ్చింది. ముందు ముందు మరింత పెరిగే అవకాశం ఉన్నట్లు మార్కెట్ వర్గాలు అంచనా వేస్తున్నాయి.
కంపెనీ స్టాక్ అవుట్ లుక్ చూసుకుంటే.. ఈ రోజు స్టాక్ మార్కెట్ ట్రేడింగ్ సెషన్లో ఒరియానా పవర్ లిమిటెడ్ షేరు 5 శాతం పెరిగి అప్పర్ సర్క్యూట్లో తాకి రూ. 2193.15 వద్ద స్థిరపడింది. ఈ షేరు 52 వారాల గరిష్ఠ ధర రూ. 2984 వద్ద ఉండగా.. 52 వారాల కనిష్ఠ ధర రూ. 281 వద్ద ఉంది. గత వారంలో చూస్తే ఈ షేరు 3 శాతం మేర లాభాలు ఇచ్చింది. గత నెల రోజుల్లో ఈ షేరు 15 శాతం పెరిగింది. గత ఆరు నెలల్లో ఏకంగా 171 శాతం లాభాలు ఇవ్వడం గమనార్హం. ఇక గత ఏడాదిలోనే 497 శాతం పెరిగింది. లక్ష రూపాయల పెట్టుబడిని ఏడాదిలోనే రూ. 6 లక్షల మేర చేసి చూపించింది. గత ఐదేళ్ల కాలంలో 592 శాతం లాభాలు అందించింది. ప్రస్తుతం ఈ కంపెనీ మార్కెట్ విలువ రూ. 4456 కోట్ల మేర ఉంది.
