Red News Navyandhra First Digital News Portal
నంద్యాల జిల్లా నందికొట్కూరు సిటీ కేబుల్‌లో బూతు వీడియాలు కలకలం రేపాయి. టీవీలు చూస్తున్న జనాలు ఏం జరుగుతుందో తెలియక ఒక్కసారిగా షాకయ్యారు. నందికొట్కూరులో ఫిరోజ్‌ కేబుల్‌లో ఆపరేటర్ల అజాగ్రత్తతో గంట పాటు బూతు వీడియోలు ప్రసారం అయ్యాయి. దసరా పండుగ కావడంతో పిల్లలకు సెలవులు కావడంతో ఇంట్లో ఉంటూ టీవీలు చూస్తున్నారు.. అలాంటి సమయంలో ఈ వీడియోలు ప్రసారం కావడంతో చిన్నారులు, మహిళలు ఇబ్బంది పడ్డారని చెబుతున్నారు.
సిటీ కేబుల్‌ నడుపుతున్న ఫిరోజ్‌కి నియోజకవర్గంలో దాదాపు 10 వేల కనెక్షన్లు ఉన్నాయి. ఈ కేబుల్‌ ఆపరేటర్లు గంటపాటు బూతు వీడియోలు ప్రసారం అవుతున్నా పట్టించుకోకపోవడంతో.. వారి నిర్లక్ష్యమే కారణమని జనాలు ఆగ్రహం వ్యక్తం చేశారు. కొంతమంది ఈ విషయంపై ప్రశ్నించేందుకు కేబుల్‌ యజమానిని సంప్రదించగా ఆయన మొబైల్ స్విచాఫ్‌ చేసుకున్నారు. గతంలో కూడా ఈ కేబుల్‌లో ఇలాంటి ప్రసారాలు జరిగినట్లు స్థానికులు చెబుతున్నారు. దీంతో కేబుల్‌ నిర్వాహకుల నిర్లక్ష్యం వల్లే ఇలా జరుగుతున్నాయని.. కేబుల్‌ ప్రసారాలను వెంటనే నిలిపివేయాలంటున్నారు.
