ఏపీలో మద్యం షాపులు దక్కించుకున్నవారికి భారీ ఊరట.. ఈ నెలాఖరు వరకు పొడిగింపు

ఆంధ్రప్రదేశ్‌లో కొత్త మద్యం షాపుల్లో అమ్మకాలు కొనసాగుతున్నాయి. రాష్ట్ర వ్యాప్తంగా 3,396 మద్యం షాపులకు సంబంధించి ఎక్సైజ్ శాఖ కీలక నిర్ణయం తీసుకుంది. అయితే ఈ మద్యం షాపులకు సంబంధించి.. ఇటీవల జారీ చేసిన ప్రొవిజినల్‌ లైసెన్స్‌ల గడువును నెలాఖరు వరకు పొడిగిస్తూ ఎక్సైజ్‌ శాఖ డైరెక్టర్‌ నిషాంత్‌కుమార్‌ ఉత్తర్వులు జారీ చేశారు. లైసెన్సీల విజ్ఞప్తి మేరకు ఈ నిర్ణయం తీసుకున్నట్లు తెలిపారు. ఈ నెల 31 వరకు ప్రొవిజినల్‌ లైసెన్స్‌లు కొనసాగుతాయి అని చెప్పారు.

రాష్ట్రంలో మద్యం షాపులు దక్కించుకున్న వారు.. ఆ వెంటనే నిబంధనల ప్రకారం వార్షిక లైసెన్సు రుసుములో ఆరో వంతు మొత్తాన్ని చెల్లించారు. షాపులు దక్కించుకున్నవారు ఈ మొత్తాన్ని చెల్లించడంతో తాత్కాలిక లైసెన్స్‌ జారీ చేశారు ఎక్సైజ్ అధికారులు. ఈ ప్రొవిజనల్ లైసెన్స్‌ల గడువు ఈనెల 22వ తేదీ వరకు అమలులో ఉంది. మద్యం షాపులను అద్దెకు తీసుకున్న తర్వాత రెండేళ్ల పాటు అమలులో ఉండే పూర్తి స్థాయి లైసెన్స్‌ జారీ చేస్తుంది ఎక్సైజ్‌శాఖ. అయితే ఈ నెల 22తో ప్రొవిజనల్ లైసెన్స్ గడువు ముగిసినా.. ఈ నెలాఖరు వరకు పొడిగించారు.

మరోవైపు రాష్ట్రంలో ఇటీవల మూతబడిన ప్రభుత్వ మద్యం షాపుల్లో ఉన్న ఫర్నీచర్‌ సహా ఇతర సామాగ్రికి సంబంధించి ప్రభుత్వ అధికారులు కీలక నిర్ణయం తీసుకున్నారు. ఈ ఫర్నీచర్‌ను ఎక్సైజ్‌ పోలీసు స్టేషన్లు, ఆఫీసులలో వినియోగించనున్నారు. ఈ మేరకు ప్రభుత్వం నడిపిన మద్యం షాపుల్లో ఉపయోగించిన కంప్యూటర్లు, ప్రింటర్లు, ఇన్వర్టర్లు, ఇతర సామాగ్రిని ఎక్సైజ్‌ స్టేషన్లు, ఆ శాఖ డీసీ, ఏసీ, ఈఎస్‌ ఆఫీసులకు తరలిస్తున్నారు. ఫర్నీచర్‌‌ను తమకు కేటాయించాలని ఎక్సైజ్‌ ఎగ్జిక్యూటివ్‌ ఆఫీసర్స్‌ సంఘం ఎక్సైజ్‌ శాఖను కోరగాజ. ఈ ప్రతిపాదనకు ప్రభుత్వం గ్రీన్ సిగ్నల్ ఇచ్చింది.